چەند ڕێنمایی یەكی گرنگ لە پێناو تەندروستی دەروونی دا , بەبۆنەی ڕۆژی جیهانی دەرووندروستی یەوە
 به‌روار‌  : 10-10-2018
 بینراوه‌  : 1052

 
 
ئــــا/ نـــاز
 
ئاشكرایە تەندروستی مرۆڤ بە گشتی پێك دێت لە تەندروست بوونی لە هەردوو ڕووی جەستەی و دەروونی یەوە , هەردووكیان تەواوكاری یەكترن بۆ ژیانێكی تەندروست و , ڕوودانی هەر نەخۆشی و ناتەواوی یەك لە جەستەدا كار یگەری ناتەندروستی هەیە بۆ سەر دۆخی دەروونی مرۆڤ , و بە پێچەوانەشەوە  ڕاستە. وە تەندروست بوونی دەرونیش كاریگەری هەیە لەسەر تەندروستی جەستە , بۆیە پێویستە گرنگی بە هەردوو لایان بدرێت.
 
لەم  ڕوانگەیەوە و بەبۆنەی ڕۆژی جیهانی تەندروستی دەروونی یەوە لەم بابەتەدا باس لە چەند ڕێنمایی یەك دەكەین كە پێویستن بۆ پاراستنی هاوسەنگی و تەندروستی دەروونی, وە هەروەها كاریگەر و یارمەتیدەریشن بۆ گەڕاندنەوەی هاوسەنگی دەروونی بۆ كەسانێك كە بە هەرهۆكارێك لە هۆكارەكان توشی حاڵەتی ناتەندروستی دەروونی بوون .. لە گرنگترین ئەو ڕێنمایی یانەش بریتین لـــــە:
 
 
1. بە دروستی هەڵسوكەوتكردن لەگەڵ خۆت : بە شێوەیەكی نەرم ونیان و بە خۆشەویستی یەوە  مامەڵە لەگەڵ خودی خۆت بكە , و واز بهێنە لە لۆمەكردنی خۆت. لە هەر  سات و تەمەنێكدایت پێویستە هەندێك كات دا تەرخان بكەیت بۆ خۆت , بۆ ئەو هیوایەت و ئارەزوە سودبەخشانەی كە خۆت پێت خۆشە و هەست دەكەیت ئارامی بە دەروونت دەبەخشن, , وەك  كاركردن لە باخچەی ماڵەكەتدا, فێربوونی ژەنینی ئامێرێكی مۆسیقی , هەوڵدان بۆ فێربوونی زمانێك كە خۆت پێت خۆشە . و هتد...
 
2. چواردەوری خۆت پڕبكە لە كەسانی باش: ئەو كەسانەی كە پەیوەندی باشیان هەیە لەگەڵا ئەندامانی خێزانەكانیان و هاوڕێكانیاندا تەندروستی دەروونی یان باشترە لە كەسانێكی تر كە كۆمەڵایەتی نین . بۆیە پێویستە لەگەڵا كەسانی باش لە خێزان و هاوڕێیان پەیوەندیت بەهێزبێت , وەیاخود پەوەندی كردن بە گروپە كۆمەڵایەتی یەكانەوە یان گروپە وەرزشی یەكان و دۆزینەوەی هاوڕێی نوێ‌ . ئەمانە هەستی باشتر بوون بە مرۆڤ دەبەخشن , چونكە مرۆڤ كائینێكی كۆمەڵایەتی یەو پێویستی بە وە هەیە هەست بە بوونی كەسانی تر بكات لە دەوروبەری .
 
3. گرنگی بە جەستەت بدە: جەستەی تەندروست دەبێتە هۆی تەندروستی و ئارامی دەروونی , بۆیە پێویستە بەردەوام گرنگی بە تەندروستی جەستە بدرێت. ئەویش بەچەند ڕێگەیەك دەبێت: لەوانە خواردنی خۆراكی تەندروست, ئاوخواردنەوەی زۆر , وەرزشكردن, و بە گشتی دووركەوتنەوە لەو شتانەی زیان بە تەندروستی جەستەدەگەیەنن.  
 
4. فێر ببە چۆن مامەڵە لەگەڵ  فشاردا بكەیت: بمانەوێت یان نەمانەوێت لە ژیاندا توشی فشاری دەروونی زۆر دەبین, بەڵام ئەوەی گرنگە ئەوەیە چۆن بتوانین بەسەریدا زاڵا ببین . چەندین ڕێگە هەن بۆ كەمكردنەوەی فشار و ڕزگاربوون كە بە پێی كەسەكان و كۆمەڵگەكانیش دەگۆڕێن, هەوڵبدە بزانە بە كام ڕێگە بۆت كاریگەرترە و زووتر ڕزگارت دەبێت , پەیڕەوی ئەوە بكە, وەك پیاسە كردن لە كەشێكی ئارامدا, ئەجامدانی هەندێك تەكنیكی یۆگا, ئەنجامدانی هەندێك پەرستشی تایبەت, ئەنجامدانی وەرزش.و هتد...
 
5. بوونی ئامانجی واقیعی: ئامانج لە ژیاندا زۆر گرنگە بۆ مرۆڤ و هاندەریەتی بۆ ژیان بە گەشبینانە. بۆیە هەر ئامانجێكت هەیە لە ژیانی ئەكادێمی, كۆمەڵایەتی , بازرگانی, یان هەر بوارێكی تر, پێویستە  واقیعی بن و بیا نوسیتەوە و هەمیشە لە پێش چاوت بن , وە هەوڵیان بۆ بدەیت  . بەمە هێز و ووزەی دەرونیت زیاتر دەبێت .
6. خۆت بپارێزە لە بێزاری : ئاشكرایە ڕۆتینی ژیان وا دەكات مرۆڤ توشی نا ئومێدی و بێزاری ببێت , بۆیە دەتوانرێت بە چەند شتێكی سادە و چەند گۆڕانكاری یەكی بچوك جارجار لە ڕۆتینی ژیان خۆت ڕزگار بكەیت لە پێناو تەندروستی دەرونیدا. لەوانەش , گۆڕینی ڕێگەی هاتوچۆكردنت, سەردانكردنی هەندێك شوێنی سروشتی و چێژوەرگرتن لە دیمەنی جوانی سروشت, خواردنی ژەمێك لە چێشتحانەیەكی جیاواز,  گرتنی چەند وێنەیكی جیاواز ,   سەفەركردن بۆ شوێن و ناوچەیەك كەپێشتر نەتان بینیبێت, گەر بۆماوەیەكی زۆر كەمیش بێت. و هتد....
 
7. ئەنجامدانی كاری خۆبەخشی: بەخشین و هاوكاری كردنی كەسانی تر ئاسوودەی بە دەروونی مرۆڤ دەبەخشێت.   مەرج نی یە بەخشین هەر ماددی و پارە بێت , بە ڵكو بەخشین زۆر فراوانە , وەك بەخشینی كات و زانست و زانیاری  و تواناكنت بە كەسانێك كە پێویستیان بە هاوكاری هەیە, لە هەر ڕوویەكەوە . توێژینەوەكان ئاماژە بەوە دەدەن كە بە خشین هەستێكی زۆر خۆش بە كەسی بەخشەر دەبەخشێت. 
 
8. دوور كەوتنەوە لە جگەرەكێشان و  ماددە هۆشبەرەكان: هەندێك كەس لە كاتی كێشەی دەروونی و كۆمەڵایەتی دا پەنا دەبەن بۆ بەكارهێنانی ماددەی هۆشبەر بۆ ڕزگاربوونیان لەو دۆخە تێیدان و پێیان وایە ئەوەئارامی یان پێدەبەخشێت, بەڵام لە ڕاستی دا پەنابردن بۆ ئەو ڕێگایانە زۆر هەڵەیەو كێشەكان زیاتر دەكات. 
 
9. داوای هاوكاری بكە : كاتێك توشی بارودۆخێكی نائارامی و ناتەندروست بویت پێویستە داوای هاوكاری و یارمەتی لە كەسانی شارەزا بكەیت كەجێگەی باوەڕ بن . هەندێك كەس پێیان وایە كە داواكردنی هاوكاری و یارمەتی مانای لاوازی یە, بەڵام ئەم بۆچونە زۆر هەڵەیە , چونكە  داواكردنی هاوكاری مانای بەهێزی مرۆڤ دەگەیەنێت كە دەیەوێت ڕووبەڕووی كێشەكان ببێتەوە و نایەوێت هەرەس بهێَنێت. 
 
10. مێشك و دەروونت ئارم بكەرەوە:  لە ئەنجامی كار و ماندوو بوونی ژیان مرۆڤەكان توشی نائارامی دەروونی و ماندوو بوونی مێشك  دەبن. بۆیە پێویستە هەوڵی خۆ ئارامكردنەوە بدەیت . چەندین ڕێگە هەن بۆ ئارامكردنەوەی مێشك و دەروون , لە هەموویان گرنگتر ئەنجامدانی (میدیتەشن) ە كە توێژینەوەكان باس لەوە دەكەن دەبێتە هۆی پێدان هەستی ئارامی دەروونی و پشوودان بە مێشك و خێراتر كردنی چاكبوونەوە لە حاڵەتە ناتەندروست و نەخۆشی یە جەستەیی و دەروونی یەكان. 
 
 
بە هیوای دەرووندرووستی بۆ هەمووان.



زیاتر ببینه

جۆرەكانی نەخۆشی شەكرە
 به‌روار‌  : 18-11-2018

ڕۆژی جیهانی نەخۆشی شەكرە
 به‌روار‌  : 15-11-2018

هەفتەی هۆشیاری
 به‌روار‌  : 14-11-2018

نیشانەكانی توشبوون بە شێرپەنجەی پەنكریاس
 به‌روار‌  : 13-11-2018

سه‌ره‌تا  |  کارمەندى نموونەیی  |  ده‌رباره‌  |  په‌یوه‌ندی
ژماره‌ی سه‌ردان : 288,224     میوان : 136
DESIGNED AND DEVELOPED BY KOD4IT -  COPYRIGHT © 2017 - 2018 BAXSHIN  ALL RIGHT RESERVED